കൊണ്ടുപോകല്‍

1

കാത്തു കാത്തിരുന്നു
വരുമെന്ന് നിനച്ചത്
മറുവഴി
കൊണ്ടുപോയി.

ഓര്‍ത്തോര്‍ത്തിരുന്നു
മനസ്സില്‍ സുക്ഷിച്ചത്
മറവി
കൊണ്ട് പോയി.


വാക്കൊര്‍ത്തിരുന്നു
പറയാന്‍ നിനച്ചത്
വിക്ക്
കൊണ്ട് പോയി

കാതോര്‍ത്തിരുന്നു
കേള്‍ക്കാന്‍ കൊതിച്ചത്
കാറ്റ്
കൊണ്ടുപോയി.

ഓടിയോടി
പറന്നു പറന്നു
നീന്തി നീന്തി
ഞാന്‍ നിന്റടുത്തെത്തും മുന്‍പേ
എന്നെ
വല കൊണ്ടുപോയി

2

തിരിച്ചടവ് മുടങ്ങിയതിനാല്‍
കടം പെരുകിയ
ഭുമിയെ
ആകാശത്തെ
ബാങ്ക് ജപ്തി ചെയ്തു
കൊണ്ട് പോയി.

നാലുവരിപ്പാതമുറിച്ചു കടക്കുന്ന
ശവഘോഷ യാത്രയെ
ടോള്‍ പിരിവുകാരന്‍
കൊണ്ടുപോയി.

ഒടുവില്‍
കൊണ്ട് പോകരുതേ
എന്ന് നിലവിളിക്കുന്ന നാക്കിനെ
മരണം
കൊണ്ടു പോയി.